مالِك?

بقالِك أهل وناس..

 وممالِك..

مالِك?

شالِك سابـِك..

طار مع نظرة عين

البِكر بكارك..

فضْ وفاض على حالِك

مالِك?  

ليلك حالِك

قمرك ضـَلـِّـك

وضـِلـِّـك

مات فى الحاره

ومات على الجسر..

ومات..

مع لون الخضره

وصوت الساقية

وفرن البيت

وياريت..

غُنا البنات 

 ساعة العصارى

ع الترع..

وإيدين العيال..

وهمّا بيشكّلوا م الطين عريس..

وللا النسيم..

والتوته..

والضِله..

وللا اللي قام..

ساعة الأدان صلّي..

يصحّوا فيكي.. 

اللي نيّمتيه بإيدك..

ما احناش عبيدك

ولا مفطومين..

ساعة ماقولتى

يامُر

عشقك أمر..

وضمتي لصِدرك زيادة هم

وغربتِك عنى..

أحن من كونك وطن..

مالكيش سكن

ولا جلابية تستُرك..  

يامّه..

ضفايرك ع السكك..

والكل واعي..

للبعيد اللى امتلك

ماتزعليش يامّه..

الضُهر أدِّن

والديوك نايمه..

حالفة ماتدَّن..

إلا وانتى بين عيالك

ناصبين عزاكى ف وسط دارك

مالِك?

*****