الليل دخل..

الليل خرج..

الضلمه مش محتاجة ليل

علشان تكون

داللى اشترى منك

غُناه..

بايت حزين

عِدِّى السنين..

 ع اللى انتى سايباه فى الخريف

مبقاش ضعيف..

اللى كتب اسمك

على كـفـُّـه

وطاف بيكى البلاد

ماسك عليكى قبضته

خايف لاقـُطـَّاع الطرق

يلمسوا حرفك بسوء

 وانتى بضفايرك سلسلة

حزِّت رقاب اللى عشق

واللى افترق عنك

وغاب

شطك معاند مركبه..

لا طال مرسى.. ولا

حس بحنانك يوم

طب عايزه أيه مني

لا عاجبك أشطبك

ولا أطلقك..

بين القصايد.. 

  تبتديها.. وتنتهى

مابقيتش قادرع الغُنا

كل الحوارى والبشر

حواديت قديمة..

ف ليل بدأ

يكسى الشوارع..

بالملل

فاسمحيلى أستلف..

حبةغناوى للبنات

لجل النهار..

مايكون نهار

 مدّي لى إيدك

وانسى مرّة انك مدينة

والمدن ملهاش ملامح

طيبة..

تحمينى من نوم الرصيف..

ضُمينى لجل ما تبتدى..

شمسك تشُق الغيم

وتدخل للغلابة..

فى البيوت

دانا من زمن

 بحلم أضمّك جوّه صدرى

اللى اتملى..

بالغربة وسط الأهل والأصحاب

قولتيلى أيه..؟

يا ام العيون غاوية السفر

يا ام السكك

مالهاش حدود....