غاب القمر..

والليل ملا صدرك..

هواجس..

وحكايات

إوعاك تخاف

واهرب من الليل والقلق

باللى انت حافظه..

من آيات..

 - 1 –

بعد النيون ما ينطفى

والميادين الوسيعه..

تضيق

لِم اللى باقى فى الشوارع

م البشر

وارحل بعيد عن أى حد

وأى شئ

 ألْضُم وشوش الناس

كما السبحة فى إيديك

وابدأ صعودك..

واعْلَى..

وانسى إن الحياة

راح تنتهى

وان الملايكة..

راح يزاحموك فى الفضا

كونك براح..

واللى اصطفاك..

أعطاك مفاتيح السما

إلقي السلام..

على النجمات فى ملكوت البديع

واغسل بدمعاتك..

طريقك للصعود

روحك تسابيح الكرام والأوليا..

كل الخلايق ساكنه فيك

وقت امّا تبدأ..

فى السؤال

م انت اللى فيك اتجمّعت

كل الصفات..

 -         2 –

يا من فناء الروح

فى عشقك..

مُبتدا

والمُنتهى فيك

الرضا..

وحياة مقام..

عين الوجود.. سيدنا النبى..

طالب مدد..

 -         3 –

 صمتك كلام

بالمُختصر..

اهبط..

خواطر نفسك الأمارة..

فارقت سكتك..

كُلك ثبات..

والنور على جبينك..

دلايل..

رحلتك