مغربيه
عجبانى جدا
بصتك
من فوق لتحت
لخصلة الشعر
اللى بتعاكس رموشك
وغمازتين
فى
ساعة الضحك حدوته
ولأن
قلبى فى اولى عشق
باستنى
لما ترجعى وسط الغيطان
وادارى
ورا التوته
واعكس الشمس
فى عيونك
تضحكى
تضحكلك
الشمس اللى نامت
فوق جبينك
مغربيه فلاحين
واضحك
قوى على مشيتك
تدارى
بين ضل البنات
واعمل معدىواسبقك
وبطرف
عينى التفت
ألقاكى لسه
مسكنه الليل
.. بين رموشك
كحل
نايم من سكات
ولأن عشقى
من زمان
طلة الليل فى العيون
انده
عليكى .. تجرى منى
تتوهينى
فى البيوت
رسمة عيونك
على البيبان
والشوارع
كلها لونك
يا لون الحنه
خطيتى على قلبى
فصار قلبى
كما
لونك
وساعة لما بلقانى
غريب
عنى
اطلع لوحدى
فوق سطوح
الدار
ودارك
على المدى
مش دار
دى طلة ضى فى العتمة
يضحك
النخل اللى واقف
على الواد
اللى غاوى البرد
ويميل
عليكى تحسى
يطقطق الجزع
اللى محنى م السكوت
تقومى
تبصى وتنامى
كأنك جوه
قلب الموت
تطبطب الريح
فوق كتافى
وتحضن البرد
اللى قام عيط دفا
والنخل
تمسح دمعته
حبة نسيم
طب
ليه بتتغير ملامحك
لما
تتمرجح ايديا
فى حضن ايد
شارع قديم
***