مخنوقة روح الكلمة

جوّه الصدر

حتى الحروف

فى النطق بتعاكس

وحلمت اشوف ف الشمس

روحها البكر..

لكن الغروب..

فى شروقها بيعاكس

 ورمانى صمت غروبها

آخر العمر..

قلبى انتفض

وصرخت..

مين حاسس..؟

مخنوقة روح الكلمة

جوّه الصدر

ملفوفة بنت..

بين الوريد والروح..

شاب الزمان

داب الوريد وانشق

 سكنه الوجع

والبنت حاضنه الروح

متكحلة بيّا

ودموعها فيّا

فابكى العدم

واحضن كيان مجروح

يصرخ ملاك العشق

غرب وشرق

مخنوقة روح الكلمة

جوّه الصدر

 حكم القدر

إنى اتولد مكسور

 يحبى الأمل..

تحت المطر والبرد

جايز أكون عاشق سراب مش نور

لكن القدر

عمره ما شاور حد

إمتى الشتا يحمى فى تلجه

طيور

لو هاندهُه

تسبقنى روحه ترد

مخنوقة روح الكلمة

جوه الصدر.